हिर्डोशी, ता. १६ : कुडली खुर्द (ता. भोर) येथील शेतकरी अशोक तुकाराम पोळ यांच्या चरायला सोडलेल्या जनावरांपैकी गाईचा बिबट्याच्या हल्ल्यात मृत्यू झाल्याची घटना मंगळवारी (ता. १६) दुपारी चारच्या सुमारास घडली.
शेतकरी पोळ यांचा मुलगा अविनाश याने सकाळी ११ वाजता डोंगरातील मालद्याचा गवंड परिसरात सहा जनावरे चरायला सोडली होती. मात्र, सायंकाळी साडेपाचच्या सुमारास एक गाय सोडून बाकीची पाच जनावरे घरी आली. त्यामुळे घरी न आलेल्या गाईला शोधायला गेल्यानंतर झुडपाजवळ गाय पडलेली दिसली. जवळ जाऊन पाहणी केल्यावर गाय जखमी अवस्थेत मृत अवस्थेत आढळून आली. बिबट्यानेच गाईवर हल्ला केल्याची खात्री झाल्याने शेतकऱ्याने सरपंच नामदेव पोळ यांना कळवले. वारंवार कुडली व परिसरात बिबट्याचे हल्ले होत असून, भागात भितीचे वातावरण निर्माण होत आहे. वनविभागाचे अधिकारी यांनी या भागात लक्ष घालून समस्या जाणून घ्याव्यात, तसेच बिबट्याचा बंदोबस्त करावा, अशी मागणी ग्रामस्थांकडून होत आहे.