हिर्डोशी, ता. १० : उपराष्ट्रीय पल्स पोलिओ लसीकरण मोहिमेसाठी भोरमधील तालुका आरोग्य विभाग व उपजिल्हा रुग्णालय सज्ज झाले असून रविवारी (ता. १२) तालुक्यातील सात आरोग्य केंद्रांतर्गत २५१ बुथमधून लसीकरण होणार आहे. तर उपजिल्हा रुग्णालयामार्फत भोर नगरपरिषद हद्दीत १५ बुथमधून लसीकरण होईल. आंबवडे, भोंगवली, नेरे, हिर्डोशी, भुतोंडे, जोगवडी, नसरापूर, उपजिल्हा रुग्णालय येथील आरोग्य केंद्र, उपकेंद्र, ग्रामपंचायत, अंगणवाडी, शाळा अशा नियोजित बुथ केंद्रांवर सकाळी आठ ते सायंकाळी पाच या वेळेत पालकांनी आपल्या शून्य ते पाच वयोगटातील बालकांना पोलिओ लसीकरणासाठी घेऊन यावे, असे आवाहन तालुका आरोग्य अधिकारी डॉ. अभय तिडके व उपजिल्हा रुग्णालयाचे वैद्यकीय अधीक्षक डॉ. महेश गुडे यांनी केले आहे.