हिर्डोशी, ता.११ : शिळिंब (ता.भोर) येथील लोंब्या आलेल्या भात पिकाला तुडतुडे किडींचा प्रादुर्भाव झाला आहे. त्यामुळे २५ हून अधिक शेतकऱ्यांच्या भात पिकांचे नुकसान होऊन पिके धोक्यात आली आहेत. उत्पादनात घट होणार असल्याचे शिळिंबमधील बहुतांश शेतकऱ्यांनी सांगितले.

भात पिकाच्या खोडावर तुडतुड्यांच्या प्रादुर्भावामुळे ठराविक ठिकाणी गोलाकारात पीक करपल्यासारखे दिसत आहे. अशा ठिकाणी लोंब्यातील भात पिकात दाना भरला जाणार नसून फक्त पळांज राहणार असल्याने उत्पादनात मोठी घट होणार आहे. गेल्या दहा दिवसांपासून वातावरणामध्ये मोठ्या प्रमाणात बदल झाला असल्याने तुडतुडेंना पोषक वातावरण निर्माण झाल्याने त्यांची वाढ व प्रसार खूप मोठ्या प्रमाणात होत आहे. त्यामुळे पिकाचे मोठे नुकसान होत आहे. असा प्रादुर्भाव दरवर्षी सप्टेंबर व ऑक्टोबर महिन्यांमध्ये दिसून येतो.

असा होतो तुडतुड्याचा परिणाम
पिल्ले व प्रौढ तुडतुडे झाडाच्या बुंध्यामधून व खोडामधून सतत रस शोषतात. पाने पिवळी पडून, झाड निस्तेज होते. सुकून वाळते. तपकिरी तुडतुड्यांचा प्रादुर्भाव शेताच्या मध्य भागातून गोलाकार खळ्याप्रमाणे पिवळे भाग दिसतात. पुढे त्याच वाढ होऊन शेत जळल्यासारखे दिसते. यालाच ‘हॉपर बर्न’ असे म्हणतात.

गावातील पंचवीसेक शेतकऱ्यांच्या भात पिकांचे तुडतुड्यामुळे नुकसान झाले आहे. यंदा उत्पादनात घट होणार आहे. शासनाने पंचनामे करून भरपाई द्यावी.
- मारुती डेरे, माजी सरपंच शिळिंब

शिळिंबमध्ये जाऊन पिकांची पाहणी केली आहे. पंचनामे करून वरिष्ठांकडे पाठविण्यात येणार आहे. जास्तीचे नुकसान टाळण्यासाठी शेतकऱ्यांनी प्रादुर्भाव झालेल्या गोलाकार भागातील भाताची कापणी करावी.
- योगेश अंभोर, सहाय्यक कृषी अधिकारी, शिळिंब

02670