हिर्डोशी, ता. २० : नेरे (ता. भोर) येथील प्राथमिक आरोग्य केंद्राच्या इमारतीभोवतीच्या परिसरात गवताची मोठ्या प्रमाणात वाढ झाली आहे. शासनाकडून वारंवार स्वच्छता अभियान राबवले जाते. तरीही आरोग्य विभागाचे याकडे दुर्लक्ष असल्याने स्थानिक नागरिक याविषयी नाराजी व्यक्त करीत आहेत.
भोर पंचायत समिती अंतर्गत असलेल्या नेरे आरोग्य केंद्रामार्फत वीसगाव खोऱ्यातील नागरिकांसाठी आरोग्य सेवा पुरवली जाते. येथील इमारत सुस्थितीत असली तरी परिसर मात्र गवताने व्यापला आहे. प्रवेशद्‌वाराजवळील रस्त्याशेजारी गवत वाढलेले आहेच, शिवाय रस्ताही खराब आहे. त्यामुळे दुचाकी, चारचाकी वाहने दवाखान्यात नेताना मोठी अडचण होत आहे. तर पावसात चालणेही कठीण जाते. आरोग्य केंद्राच्या दरवाजासमोरही कॉंक्रिट रस्त्याचा तेवढा भाग सोडला तर इमारतीच्या चहुबाजू गवताने व्यापल्या आहेत. या वाढलेल्या गवतामुळे रात्रीच्या वेळेस सर्प, विंचू दंशाचा धोका निर्माण झाला आहे. हे गवत काढून परिसर स्वच्छ करण्याची मागणी रुग्ण व स्थानिक नागरिकांनी केली आहे.

आरोग्य केंद्रातील राहण्याच्या खोल्यांशेजारील भागात औषध फवारणी केली आहे. सफाई कर्मचारी पद रिक्त आहे व निधीही उपलब्ध नाही. त्यामुळे ग्रामपंचायतीकडे स्वच्छतेसाठी मागणी केली आहे. लवकरच गवत काढून स्वच्छता केली जाईल.
- प्रेमला कांबळे, आरोग्य अधिकारी, नेरे आरोग्य केंद्र.