हिर्डोशी, ता. ७ : भोर तालुक्यातील नीरा देवघर धरण रिंग रोडवरील गुढे व निवंगण गावच्या दरम्यान रस्त्यावरील दोन ठिकाणच्या मोऱ्यांची मागील काळात झालेल्या अतिवृष्टीत दुरवस्था झाली होती. या दोन्ही मोऱ्यांच्या ठिकाणी नवीन छोटे पूल बांधण्यात येत असून, त्याचे काम सुरू आहे.
अतिवृष्टी काळात डोंगरावरील दगडधोंडे, राडारोडा वाहून आल्याने मोऱ्यांची दुरवस्था झाली होती. मुसळधार पाऊस झाला की मोरीवरून पाणी वाहत असे. रस्ता पाण्याखाली गेल्यावर पाण्यातून वाहने नेताना धोकादायक परिस्थिती निर्माण होत होती. त्यामुळे दोन्ही मोऱ्या उंचवण्याची गरज होती. भोरच्या सार्वजनिक बांधकाम विभागाकडून याची दखल घेत मोऱ्यांच्या ठिकाणी छोटे पूल बांधण्यासाठी प्रस्ताव प्रशासन स्तरावर देण्यात आला. त्यातूनच या दोन्ही नव्याने बांधण्यात येणाऱ्या पुलांसाठी एकूण १ कोटी ५० लाख निधीस मंजुरी मिळाली असून, पुलांचे काम वेगात सुरू आहे. या ठिकाणची पावसाळ्यातील वाहतूक सुरळीत होणार असल्याने स्थानिकांनी समाधान व्यक्त केले. तसेच, पुलाचे काम होईपर्यंत नागरिकांनी पर्यायी रस्त्याने सुरक्षित प्रवास करण्याचे आवाहन बांधकाम विभागाने केले आहे.

सहा मीटर व सात मीटर लांबीच्या अशा दोन्ही पुलांचे काम वेगाने सुरू असून, कामाच्या दर्जाची वेळोवेळी पाहणी केली जाते. पावसापूर्वी दोन्ही पुलाचे काम पूर्ण होऊन पूल वाहतुकीस खुले केले जाणार आहेत.
- विशाल गुजर, शाखा अभियंता, सार्वजनिक बांधकाम विभाग, भोर

02967