हिर्डोशी, ता. २३ : धानवली (ता. भोर) या रायरेश्वराच्या पायथ्याथी डोंगरात वसलेल्या आदिवासी पाड्यावर जाणाऱ्या रस्त्यासाठी ठक्कर बाप्पा विकास योजनेतून मंजूर २० लाख रुपये निधीच्या, तर ५ लाख निधीच्या सभामंडपाच्या कामाचे शुक्रवारी (ता. २०) भूमीपूजन झाले. रस्त्याच्या कामाची प्रत्यक्षात सुरवात झाल्याने ग्रामस्थांनी समाधान व्यक्त केले.
आदिवासी विकास प्रकल्प अधिकारी घोडेगाव (ता. आंबेगाव) यांच्या माध्यमातून ठक्कर बाप्पा विकास योजनेंतर्गत आमदार शंकर मांडेकर यांनी मंजूर केलेल्या व जिल्हा परिषदेचे माजी उपाध्यक्ष रणजित शिवतरे यांनी निधीसाठी प्रयत्न केले. आदिवासी कल्याण संवर्धन संस्थेचे जिल्हाध्यक्ष सुनील कोळपे व आदिवासी कोळी महादेव संघटनेचे भोर तालुकाध्यक्ष दत्तात्रेय धानवले व विस्तार अधिकारी शिवराज पाटील यांचे हस्ते भूमिपूजन करण्यात आले. यावेळी ग्राम विकास अधिकारी महेश कालेकर, मेघराज सोनवणे, महिपती धानवले, नथू धानवले, आनंद धानवले, दत्ता धानवले, भगवान धानवले, कोंडिबा धानवले, तुकाराम धानवले, तानाजी धानवले, सखाराम धानवले, दिलीप धानवले, नागेश धानवले, डी. एस. मोहिते व ग्रामस्थ उपस्थित होते.