नारायणगाव, ता. २८ : येथील वारूळवाडी- गुंजाळवाडी रस्त्यावर धुमाळीच्या ओढ्याजवळ दुचाकीवर चाललेल्या दोघांवर बिबट्याने हल्ला केला. त्यात एक जण गंभीर जखमी झाला असून, त्यांच्यावर नारायणगाव ग्रामीण रुग्णालयात उपचार सुरू आहेत. ही घटना गुरुवारी रात्री साडेसात वाजण्याच्या सुमारास घडली.
कुकडी पाटबंधारे विभागातील कर्मचारी दत्तात्रेय अर्जुन ढवळे व तुकाराम हरिभाऊ ढवळे हे गुरुवारी सायंकाळी नारायणगाव येथून गुंजाळवाडी येथे घरी जाण्यासाठी निघाले होते. सायंकाळी साडेसात वाजण्याच्या सुमारास वारूळवाडी हद्दीतील धुमाळी ओढा येथे बिबट्याने मोटर सायकलच्या मागे बसलेले तुकाराम ढवळे यांच्यावर हल्ला चढवला. त्यांच्या पोटरीजवळील भागात बिबट्याचे सुळे खोलवर घुसले आहेत. इतरही ठिकाणी जखमा झाल्या आहेत. त्यांना नारायणगाव येथील ग्रामीण रुग्णालयात उपचारासाठी दाखल केले आहे.
या भागात मागील आठवडाभरात बिबट्याने मानवावर केलेला हा चौथा हल्ला आहे. दोन ते तीन बिबटे टोळीने या भागात फिरताना दिवसा दिसत आहेत. यामुळे कांदा काढणी व शेतातील इतर कामे ठप्प झाली आहेत. या भागातील बिबट्यांना पिंजऱ्याची जाणीव झाल्यामुळे बिबटे आता पिंजऱ्यात अडकले जात नाहीत. वनविभागाने बिबट्यांचा बंदोबस्त करावा, अशी मागणी वारूळवाडीचे माजी सरपंच राजेंद्र मेहेर यांनी केली आहे.