नारायणगाव, ता.१९: नारायणगाव बस स्थानकात उभ्या असलेल्या अल्पवयीन विद्यार्थिनीशी असभ्य वर्तन करणारा बसचालक दौलत शंकर शेळके (वय ४८) याला निलंबित करण्यात आले आहे, अशी माहिती आगार प्रमुख वसंत आरगडे यांनी दिली.
शाळा सुटल्यानंतर घरी जाण्यासाठी विद्यार्थिनी शनिवारी (ता. १२) दुपारी तीन वाजता बसची वाट पाहत नारायणगाव बस स्थानकात मैत्रिणी सोबत उभी होती. दरम्यान, नारायणगाव आगाराचा बसचालक दौलत शेळके हा पंढरपूर नारायणगाव बस घेऊन स्थानकात आला. बसची नोंद करण्यासाठी नियंत्रण कक्षाकडे जात असताना शेळके याने बसस्थानकात उभ्या असलेल्या अल्पवयीन मुलींच्या गळ्यात हात घातला. तिच्या डोक्यावर टपली मारून असभ्य वर्तन केले. या बाबतचे सीसीटीव्ही फुटेज उपलब्ध झाले आहेत. घटनेची माहिती संबंधित मुलगी व तिच्या मैत्रिणीने गुरुवारी (ता. १७ ) पालकांना सांगितली. त्यानंतर पालक व ग्रामस्थांनी आगार प्रमुख आरगडे यांच्याकडे लेखी तक्रार केली. पालकाची तक्रार व उपलब्ध झालेले सीसीटीव्ही फुटेज याची गंभीर दखल घेऊन शेळके याला निलंबित केले आहे. याबाबतची माहिती वरिष्ठांना पाठवली आहे.अशी माहिती आगार प्रमुख वसंत आरगडे यांनी दिली.