नारायणगाव, ता. १ : नारायणगाव येथे (ता. जुन्नर) दूषित पाणी पिल्यामुळे झालेल्या विषबाधेमुळे पोट फुगून हृदयावर ताण पडल्याने नऊ मेंढ्यांचा मृत्यू झाला असल्याचे शवविच्छेदन अहवालावरून स्पष्ट झाले आहे, अशी माहिती पशुवैद्यकीय अधिकारी अरुण ओतारी यांनी दिली.
पळशी वनकुटे (ता. पारनेर) येथील मेंढपाळ गुरुवारी सकाळी नारायणगाव येथील पाटे- खैरे मळा रस्त्यालगत
मेंढ्या चारत होते. दुपारी साडेबारा वाजण्याच्या १०० मेंढ्यांपैकी नऊ मेंढ्यांचा अचानक मृत्यू झाला. अचानक मेंढ्या मृत होऊ लागल्यामुळे मेंढपाळ कुटुंबाने केलेला आक्रोश पाहून स्थानिक शेतकरी त्यांच्या मदतीला धावून आले. स्थानिक पशुवैद्यक डॉ. प्रणेश ढवळे तातडीने घटनास्थळी आले. मात्र, उपचारापूर्वीच नऊ मेंढ्या मृत झाल्या. ग्राम महसूल अधिकारी आर. एन. इलग यांनी मृत मेंढ्यांचा पंचनामा केला. पंचनामा अहवालानुसार मृत मेंढ्यांपैकी आठ मादी व एक नर मेंढी होती. मेंढ्या मृत झाल्याने मेंढपाळाचे २ लाख ३५ हजार रुपयांचे नुकसान झाले आहे, तसा अहवाल तहसील कार्यालयात दिला आहे, अशी माहिती ग्राम महसूल अधिकारी इलग यांनी दिली.