नारायणगाव, ता. १२ : बेकायदेशीररित्या पाळीव प्राण्यांची कत्तल करून आलिशान मोटारीमधून गोमांस मुंबई येथे विक्रीसाठी घेऊन निघालेल्या दोन जणांना नारायणगाव पोलिसांनी अटक केली. या आरोपींकडून गोमांस वाहतुकीसाठी वापरलेली आलिशान मोटर, ६५० किलो गोमांस, असा ३ लाख ७० हजार रुपये किमतीचे मुद्देमाल जप्त केला. ही कारवाई गुरुवारी सायंकाळी सात वाजण्याच्या सुमारास येथील पुणे- नाशिक महामार्ग बाह्यवळण रस्त्यावर केली, अशी माहिती नारायणगाव पोलिस ठाण्याचे सहाय्यक पोलीस निरीक्षक प्रवीण सपांगे यांनी दिली.
या प्रकरणी मोहम्मद जाकीर शेख (वय ३३), सिकंदर इब्राहिम शेख (वय ३५, दोघेही रा. अंधेरी पश्‍चिम, मुंबई) यांना अटक केली. त्यांच्यावर महाराष्ट्र प्राणी संरक्षण कायद्यानुसार गुन्हा दाखल केला आहे. संगमनेर शहरात पाळीव गायी व बैलांची कत्तल करून त्यांचे मांस आलिशान मोटारीमध्ये भरून आरोपी मुंबई येथे घेऊन निघाले होते. याबाबतची माहिती गोरक्षक शिवराज संगनाळे, ऋषीकेश जंगम, ओम जाधव, देव जाधव, निखिल जाधव, सुरज चव्हाण, ऋतिक सोनवणे, आकाश रसाळ, रोहित लालबेग, आकाश जाधव, सिद्धेश पडघम या गोरक्षकांना मिळाली होती. त्यांनी ही माहिती नारायणगाव पोलिसांना दिली. मिळालेल्या माहितीच्या आधारे नारायणगाव पोलिसांनी येथील बाह्यवळण रस्त्यावर आलिशान मोटारीची तपासणी केली. त्यात या मोटारीमधील मागील सिट काढून मोकळ्या जागेत गोमांस भरले होते. पोलिसांना संशय येऊ नये म्हणून आरोपींनी गोमांस वाहतुकीसाठी आलिशान मोटरीचा वापर करून काचेला काळे पडदे लावले होते. मात्र, गोरक्षक व पोलिसांच्या तत्परतेमुळे हा प्रकार उघडकीस आला.