नारायणगाव, ता. ११: आईपासून दुरावलेल्या आणि अन्नावाचून व्याकुळ झालेल्या तरसाच्या दोन पिल्लांना नारायणवाडी (ता. जुन्नर) येथे जीवदान मिळाले. शेतकरी, आपदा मित्र सुशांत भुजबळ आणि वनविभागाच्या तत्परतेमुळे या तीन महिन्यांच्या पिल्लांना सुरक्षितपणे माणिकडोह येथील निवारा केंद्रात दाखल केले आहे.
नारायणवाडी येथील एकनाथ कोकाटे यांच्या शेतात मागील चार दिवसांपासून ही पिल्ले अन्नाच्या शोधात फिरत होती. पिल्लांची आई दगावल्याने ती निराधार झाली होती. स्थानिक शेतकऱ्यांनी त्यांना दूध व पाणी देऊन वनविभागाला माहिती दिली. वनपरिक्षेत्राधिकारी प्रदीप चव्हाण व वनपाल अनिता होले यांच्या मार्गदर्शनाखाली वनरक्षक ज्ञानेश्वर पवार आणि सुशांत भुजबळ यांनी घटनास्थळी धाव घेत दोन्ही पिल्लांना ताब्यात घेतले.
या पिल्लांमध्ये एक नर आणि एक मादी असून, त्यांच्यावर डॉ. अविनाश विसलकर व डॉ. महेंद्र ढोरे यांनी प्राथमिक उपचार केले. प्रकृतीत सुधारणा झाल्यानंतर या पिल्लांना नैसर्गिक अधिवासात सोडले जाणार आहे.
08074