नारायणगाव, ता. २२ : बेकायदेशीररीत्या गावठी कट्टे बाळगल्याप्रकरणी पुणे ग्रामीणच्या स्थानिक गुन्हे शाखा पथकाने निमगाव सावा (ता. जुन्नर) येथे सापळा रचून तीन तरुणांना अटक केली. आरोपींकडून दोन गावठी कट्टे, दोन जिवंत काडतूस, इर्टिगा मोटार, असा ५ लाख ७२ हजार रुपये किमतीचा मुद्देमाल जप्त केला. आरोपींना जुन्नर न्यायालयाने चार दिवसांची पोलिस कोठडी दिली आहे.
या प्रकरणी राहुल साळवे (रा. साकोरी, ता. जुन्नर), दर्पण सुरेश पवार (वय २२, रा. नारायणगाव, ता. जुन्नर), तेजस संदीप मातेले (वय २१ रा. नारायणगाव) यांना अटक केली आहे. पुणे ग्रामीणच्या स्थानिक गुन्हे शाखा पथकातील पोलिस अधिकारी व कर्मचारी सोमवारी (ता. २०) जुन्नर तालुक्यात पेट्रोलिंग करत होते. दरम्यान नारायणगाव पोलिस स्टेशनच्या हद्दीतील कारफाटा, निमगाव सावा येथे काही तरुण गावठी कट्टे घेऊन येणार असल्याची माहिती मिळाली. पोलिसांनी सापळा रचून इर्टिगा मोटारीतून आलेल्या तीन संशयित तरुणांना ताब्यात घेऊन त्यांची अंगझडती केली. या वेळी राहुल साळवे, तेजस मातेले यांच्या कमरेला खोसलेले दोन गावठी कट्टे व दोन जिवंत काडतुसे आढळून आली. ही कारवाई स्थानिक गुन्हे शाखेचे वरिष्ठ पोलिस निरीक्षक प्रमोद क्षीरसागर यांच्या मार्गदर्शनाखाली स्थानिक गुन्हे शाखेचे सहाय्यक पोलिस निरीक्षक महादेव शेलार, प्रवीण सपांगे, सहाय्यक फौजदार दीपक साबळे, पोलिस हवालदार संदीप वारे, अक्षय नवले यांच्या पथकाने केली.