नसरापूर, ता.१८ : व्यवसायासाठी ३६ लाख रुपये कर्ज मंजूर करुन देतो, असे सांगून दोन लाख पन्नास हजार रुपये घेऊन एकाने पोबारा केला आहे. याबाबत राजगड पोलिस ठाण्यात तक्रार दाखल केली आहे.
याप्रकरणी नीता सतीश आवाळे (वय ४२ रा. सारोळा ता.भोर) यांनी राजगड पोलिस ठाण्यात फिर्याद दिली. त्यांनी सारोळा येथे त्यांच्या शेजारी राहणारा अषुतोष चौगुले (मूळ गाव बेळगाव (पूर्ण पत्ता नाही) याने आवाळे यांना त्यांच्या घरगुती व्यवसायासाठी ३६ लाख रुपये कर्ज मंजूर करुन देतो, असे सांगितले. त्या कर्ज मंजुरीसाठी पैसे लागतील, असे सांगून जून २०२२ पासून जून २०२३ पर्यंत वेळोवेळी मागून दोन लाख पन्नास हजार रुपये घेतले. यानंतर चौगुले यास कर्ज मंजुरीबाबत वारंवार विचारले असता साहेबांची सही राहिली आहे. ती सही झाली की रक्कम मिळूल, असे त्याने सांगितले. परंतु एप्रिल महिन्यापासून तो बेपत्ता आहे. त्याचा मोबाईलही बंद आहे. त्याचा शोध घेतला असता सापडला आला नाही. म्हणून फिर्यादीने आपली फसवणूक झाल्याचे लक्षात आल्यावर जून महिन्यात पोलिस ठाण्यात तक्रार दिली. याबाबत किकवी पोलिस चौकीचे सहायक पोलिस निरीक्षक नितीन खामगळ पुढील तपास करत आहेत.