नसरापूर, ता. ९ : भोर तालुक्यातील कांबरे गिऱ्हेवस्ती येथे काही दिवसांपूर्वी ग्रामस्थांना बिबट्या आढळून आल्याची घटना ताजी असतानाच वागजवाडी येथे बिबट्याने श्‍वानावर हल्ला केल्याची घटना घडली. त्यामुळे ग्रामस्थ चिंताग्रस्त झाले असून वनखात्याने या बाबत उपाययोजना करण्याची मागणी केली आहे.
कांबरे खे. बा. गावच्या डोंगराकडील गिऱ्हे वस्तीवर गराडे खिंडीकडे जाणाऱ्या नवीन डांबरी रस्त्याकडे बुधवारी (ता. ५) रात्रीच्या सुमारास महेश शिंदे कामावरून येत असताना त्यांच्या गाडीला बिबट्या आडवा गेला होता. या वेळी त्यांनी बिबट्याचे छायाचित्रण केले आहे. याबाबत वनकर्मचाऱ्यांना माहिती दिल्यावर त्यांनी देखील याबाबत खात्री केली होती.
कांबरेतील घटनेनंतर रविवारी (ता. ९) पहाटेच्या सुमारास वागजवाडी येथील रामदास तुकाराम मोरे या शेतकऱ्याच्या पाळीव श्‍वानावर बिबट्याने हल्ला करून त्यास ठार केले. श्‍वानाला साखळीने बांधल्याने बिबट्याला त्याला बरोबर घेऊन जाता आले नाही. यावेळी एक बिबट्याची मादी आणि तीन पिल्ले असल्याचे शेतकऱ्यांनी पाहिल्याचे सांगितले.