नसरापूर, ता. ११ : पुणे-सातारा महामार्गावर केळवडे (ता. भोर) गावच्या हद्दीत सेवा रस्त्यावरून जाणाऱ्या दुचाकी स्वाराची दुचाकी घसरून झालेल्या अपघातात दुचाकी चालवणाऱ्या तरुणाचा मृत्यू झाला.
शुवंकर मधुसूदन घोष (वय २८, रा. मुळगाव, नौदा माझापाडा राज्य पश्चिम बंगाल, सध्या रा. हॉटेल सम्राट फॅमिली ढाबा, वरवे खुर्द ता. भोर) या तरुणाचा या अपघातात मृत्यू झाला. सोमवारी (ता. ९) सायंकाळी पावणेसात वाजण्याच्या सुमारास शुवंकर हा त्याची मोटारसायकल एम.एच. १२ टि डब्लू ०११० वरून कापूरहोळ येथून वरवे येथे येत असताना केळवडे गावच्या हद्दीत सेवा रस्त्यावरील राजस्थानी ढाबा जवळ त्याची भरवेगात असलेली दुचाकी घसरली व या अपघातात त्याच्या डोक्यास गंभीर दुखापत झाली व त्यात त्याचा मृत्यू झाला.
या अपघाताबाबत मृत शुवंकर याचा भाऊ दीपंकर मधुसूदन घोष याने राजगड पोलिस ठाण्यात खबर दिली आहे. याबाबत पोलिस हवालदार किरण बरकले पुढील तपास करत आहेत.