खेड शिवापूर, ता. १८ : पुणे- सातारा महामार्गावर भरधाव टेम्पोने धडक दिल्याने पायी रस्ता पार करणाऱ्या व्यक्तीचा २ फेब्रुवारी रोजी गंभीर जखमी होऊन मृत्यू झाला होता. शेषराव नारायण पाटील (वय ५३, रा. संतोषनगर- कात्रज, पुणे) यांचा या अपघातात मृत्यू झाला. याबाबत मंगळवारी (ता. १८) गुन्हा दाखल केला.
याबाबत तानाजी विठ्ठल मोरे (वय ५३, रा. गोगलवाडी) यांनी राजगड पोलिस ठाण्यात फिर्याद दिली. शेषराव पाटील हे २ फेब्रुवारी रोजी सकाळी साडेआठ वाजण्याच्या सुमारास गोगलवाडी फाटा येथून पायी चालत कंपनीकडे जात असताना पुणे- सातारा लेनवर भरधाव येणाऱ्या टेम्पोची (क्र. एम.एच. ११ डी.डी. ५७४७) त्यांना पाठीमागून ठोकर बसली. या अपघातात ते गंभीर जखमी झाले. त्यामध्ये त्यांचा मृत्यू झाला. अपघातानंतर पळून गेलेल्या टेम्पो चालकाला टेम्पोसह पोलिसांनी पाठलाग करून ताब्यात घेतले. टेम्पो चालक तुषार दादासाहेब जाधव (वय ४६, रा. अपसिंगे, ता. जि. सातारा) यास ताब्यात घेतले. त्याच्यावर मंगळवारी (ता. १८) गुन्हा दाखल केला. पुढील तपास पोलिस हवालदार सागर गायकवाड करत आहेत.