नसरापूर, ता. १५ : कापूरहोळ (ता. भोर) ग्रामपंचायतीच्या नऊपैकी पाच सदस्यांनी सरपंच कारभारात विश्वासात घेत नसल्याचा आरोप करत राजीनामे दिले.
कापूरहोळ ग्रामपंचायतीचे विद्यमान सदस्य गुलाब बाळासाहेब गाडे, रोहीत सर्जेराव जगताप, शोभा आनंद गाडे, सविता विवेक गाडे, विनया अनिकेत सपकाळ या पाच सदस्यांनी त्यांचे राजीनामे सरपंच ग्रामपंचायत कापूरहोळ यांच्या नावे पोस्टाने पाठवले आहेत. राजीनामा दिल्यानंतर गटविकास अधिकाऱ्यांना निवेदन दिले. त्यामध्ये कापूरहोळ ग्रामपंचायतीमध्ये सदस्यांची नियमित मासिक बैठक होत नाही. सदस्यांना ग्रामपंचायत कारभारात विश्वासात घेतले जात नाही. त्यांचे म्हणणे विचारात घेतले जात नाही, अशी तक्रार केली असून, ग्रामपंचायतीच्या कारभाराबाबत सखोल चौकशी करावी, अशी मागणी केली आहे. तसेच, या कारणासाठी आम्ही आमच्या सदस्यपदाचा राजीनामा देत असल्याचे म्हटले आहे.
याबाबत गटविकास अधिकारी किरणकुमार धनवाडे यांच्याशी संपर्क साधला असता त्यांनी सांगितले की, माझ्याकडे याबाबत निवेदन अद्याप पोचले नाही. सदस्यांच्या राजीनाम्याबाबत ग्रामपंचायत सरपंच निर्णय घेत असतात. निवेदन आल्यावर त्यांच्याकडेच पुढील कार्यवाहीसाठी पाठवले जाईल.
याबाबत कापूरहोळच्या सरंपच मंगल गाडे यांच्याशी संपर्क होऊ शकला नाही. उपसरपंच पंकज गाडे यांच्याशी संपर्क साधला असता त्यांनी सांगितले की, ग्रामपंचायतीच्या कारभारात सर्वांना विश्वासात घेऊनच काम केले जाते. काही सदस्यच मासिक बैठकीला उपस्थित राहत नाहीत. राजीनामा दिलेल्या सदस्यांनी अद्याप प्रत्यक्षात येऊन राजीनामे दिलेले नाहीत. २१ एप्रिल रोजी याबाबत बैठक आयोजित केली आहे. त्यावेळी चर्चा करणार आहोत. त्यांची इच्छा असेल तर राजीनामा मंजूर करण्यात येईल.