खेड शिवापूर : गोगलवाडी (ता.हवेली) येथे शेतीच्या रस्त्याच्या वादातून सात जणांनी एकास मारहाण केली. तसेच शिवीगाळ करून जीवे मारण्याची धमकी दिली. याप्रकरणी राजगड पोलिस ठाण्यात सात जणांविरुध्द गुन्हा दाखल केला आहे.
सोमनाथ अंकुश गोगावले (वय ३८ रा. गोगलवाडी ता.हवेली) यांनी या बाबत फिर्याद दिली. त्यामध्ये महादेव एकनाथ गोगावले, भरत एकनाथ गोगावले, निवृत्ती एकनाथ गोगावले, भारती निवृत्ती गोगावले, मिराबाई नामदेव गोगावले, जयश्री भरत गोगावले व दर्शना महादेव गोगावले (सर्व रा. गोगलवाडी ता.हवेली) यांच्याविरुध्द तक्रार केली आहे. सोमनाथ गोगावले हे बुधवार (ता.४) सायंकाळी सहा वाजता गट क्र.६३३ मधून जाणाऱ्या कच्च्या रस्त्यामध्ये मुरुम टाकून रस्त्यामधील खड्डे बूजवत असताना महादेव गोगावले हे तेथे येऊन तेथील मुरुमामधील दगड उचलून सोमनाथ यांच्या छातीत तसेच गुडघ्यावर मारून त्यांना दुखापत केली व नंतर त्यांच्या कुटुंबातील इतरांना बोलावून घेतले या सर्वांनी बेकायदेशीर जमाव जमवून सोमनाथ यांना शिवीगाळ दमदाटी करून जीवे मारण्याची धमकी दिली.
या भांडणात सोमनाथ यांची पत्नी वैशाली या सोडवण्यासाठी आल्या असता त्यांना देखिल धक्काबुक्की करण्यात आली त्या मध्ये वैशाली यांचे गळ्यातील सोन्याचे मंगळसूत्र गहाळ झाल्याचे म्हटले आहे.