नसरापूर, ता.२४ : मंदिरात दर्शनासाठी आलेल्या ज्येष्ठ महिलेला तुमच्या हस्ते मंदिरात माझी दक्षिणा ठेवा, असे म्हणून रोख पैसे दिले व विश्वास संपादन केला. महिलेस दुसऱ्या मंदिरात दुचाकीवर घेऊन जाऊन तिथे गेल्यावर तिच्या गळ्यातील सोन्याचे गंठण व हातातील अंगठी लंपास करून गुरुवारी (ता.२४) सकाळी दहा वाजण्याच्या सुमारास चोरटा पसार झाला. मात्र, चोराटा सीसीटीव्ही कैद झाला आहे.
या बाबत कमल शिवाजी रेणुसे (वय ६५, रा. नसरापूर स्वामीसमर्थनगर) या ज्येष्ठ महिलेने राजगड पोलिस ठाण्यात फिर्याद दिली आहे. दरम्यान, महिलेच्या गळ्यातली दोन तोळे वजनाचे सोन्याचे गंठण व हातातली अर्धा तोळे वजनाची एक अंगठी असे मिळून सुमारे दोन लाख ४० हजाराचे सोन्याचे दागिने होते.
या बाबत पोलिसांनी नसरापूर मधील सीसीटीव्ही ची पाहणी केली असता एका काळ्या रंगाच्या स्कुटरवरून सदर महिलेला घेऊन चाललेला आरोपी दिसत असल्याचे निष्पन्न झाले आहे गाडीचा क्रमांक देखील मिळाला असून, लवकरच आरोपी ताब्यात मिळेल, अशी माहिती पोलिस अधिकाऱ्यांनी दिली आहे. पुढील तपास पोलिस हवालदार अजय माने करत आहेत.

05612