खेड शिवापूर, ता. २९ : शिवगंगा खोऱ्यातील वेळू (ता. भोर) येथील महावितरणच्या वीज उपकेंद्राचे रखडलेले काम, अपुरा व विस्कळित वीजपुरवठा या अडचणींच्या पार्श्वभूमीवर येथील उद्योजक आणि स्थानिक नागरिक त्रस्त झाले आहेत. या त्रस्त नागरिक आणि उद्योजकांनी सोमवारी (ता. २८) सकाळी महावितरण कार्यालयाला घेराव घालून जाब विचारला.
यावेळी संतप्त नागरिकांनी येत्या आठ दिवसांत वीजपुरवठा नियमित झाला नाही तर यापेक्षाही तीव्र आंदोलन करून वीजवितरणशी असहकार केला जाईल, अशी भूमिका घेतल्यावर कार्यकारी अभियंता देविदास बाइकर यांनी तातडीने उपाययोजना करून उद्योगांना नियमित वीजपुरवठा केला जाईल असे आश्वासन दिले.
शिवगंगा खोऱ्यात अनेक छोटे- मोठे उद्योग आहेत. मात्र, अनेक वर्षांपासून या भागात अपुरा आणि विस्कळित वीज पुरवठ्याचा या उद्योगांना सामना करावा लागत आहे. त्यासाठी नवीन वीज उपकेंद्र प्रस्तावित आहे. त्यासाठी गेल्या दीड वर्षापूर्वी ग्रामस्थांनी जागा उपलब्ध करून दिली आहे. मात्र, अद्याप या उपकेंद्राच्या कामाला सुरुवात झालेली नाही. दुसरीकडे विजेच्या समस्येला स्थानिक नागरिक आणि उद्योजकांना रोज सामोरे जावे लागत आहे. या पार्श्वभूमीवर वेळू येथील स्वराज्याचे शिलेदार संघटना, व्यावसायिक आणि ग्रामस्थांनी महावितरण कार्यालयाला घेराव घातला.
यावेळी या वीज उपकेंद्राचे काम नक्की कुठे अडकले आहे? याची खुद्द महावितरण अधिकाऱ्यांनाच माहिती नसल्याचे दिसून आले. त्यामुळे उद्योजक आणि स्थानिक नागरिक संतप्त झाले होते. नागरिकांच्या वतीने यावेळी कार्यकारी अभियंता, मुळशी विभाग पुण्याचे देविदास बायकर यांना मागण्यांचे निवेदन देण्यात आले. यावेळी पुणे जिल्हा नियोजन समितीचे सदस्य अमोल पांगारे, विद्युत ठेकेदार असोसिएशनचे महाराष्ट्र प्रदेश अध्यक्ष योगेश घोरपडे, ईश्वर पांगारे, सतीश कुलकर्णी, संजय राजेभोसले, प्रमोद पाटील, किरण पाटील, कैलास गोगावले, सोनबा घुले राहुल पांगारे, ॲड. संतोष शिंदे उपस्थित होते.