खेड शिवापूर, ता. १६ : जुने झालेले भांडण मिटवायचे आहे, असे म्हणून फसवून वेळू फाटा (ता. भोर) येथे बोलावून
तरुणासह त्याच्या पाच मित्रांच्या अंगावर टेम्पो घालून जीवे मारण्याच्या प्रयत्नात एकाचा टेम्पो खाली चिरडून मृत्यू झाला. याबाबत राजगड पोलिस ठाण्यात टेम्पो चालक तरुणासह पाच जणांवर खुनाचा गुन्हा दाखल केला आहे. पाचही आरोपींना पोलिसांनी ताब्यात घेतले आहेत.
अविनाश संतोष सातपुते (वय १७) या तरुणाचा या घटनेत मृत्यू झाला असून, त्याची आई कलावती संतोष सातपुते (वय ३६, व्यवसाय मजुरी, रा.कात्रज-कोंढवा रोड, पुणे) यांनी फिर्याद दिली आहे. त्यानुसार आरोपी समीर मोहम्मद शेख (वय २२), अनिकेत बाळू शिंदे (वय २४), तन्वीर तानाजी पांगारे (वय १८), दिगंबर ऊर्फ साहिल अनिल पांगारे (वय २५, सर्व रा. वेळू) व सूरज विलास पवार (वय २८, रा. वरवे, ता. भोर) या पाच जणांना पोलिसांनी ताब्यात घेतले.
पोलिसांनी दिलेल्या माहितीनुसार, अविनाश याचा मित्र प्रदिप मुजुमले याच्याबरोबर आरोपी समीर शेख याचा भाऊ अमिन शेख याच्याबरोबर झालेल्या जुन्या भांडणाबद्दल दिगंबर ऊर्फ साहिल पांगारे याने १६ आॅगस्ट रोजी पहाटे अडीच वाजण्याच्या सुमारास त्याच्या मोटारसायकलवर (क्र. एम.एच. १२ वाय.ई. ३३८१) येऊन भांडणे मिटवायची आहेत, असे सांगून अविनाश व त्याचे मित्र प्रदिप मुजुमले, हर्षद घुगे, ऋषी जाधव, शंभु अडागळे, सुमीत राठोड यांना वेळू फाटा येथे बोलावले व रस्त्यावर थांबण्यास सांगितले. यावेळी यातील आरोपी समीर शेख याने त्याचे मित्र अनिकेत, तन्वीर, दिगंबर व सूरज यांच्यासमवेत त्याच्या ताब्यातील बस (क्र. एम.एच. १२ वाय.बी. ८५१३) घेऊन अविनाश व त्याचे मित्रांच्या अंगावर घालून जीवे मारण्याचा प्रयत्न केला व निघून गेला. त्यानंतर दहा मिनिटांनी समीर शेख याने पुन्हा टेम्पो (क्र. एम.एच. १२ पी.एफ. २१५३) घेऊन येऊन वेळू फाटा येथील सेवा रस्त्यावर उभे असलेल्या अविनाश व त्याचे मित्रांच्या अंगावर टेम्पो घातला. यामध्ये अविनाश टेम्पोच्या चाकाखाली चिरडल्या गेला. मित्रांनी त्यास तातडीने रुग्णालयात नेले, परंतु उपचारापूर्वीच त्याचा मृत्यू झाला होता.
रुग्णालयाकडून रात्रीच्या गस्तीवर असलेले पोलिस हवालदार सागर गायकवाड यांना माहिती मिळाली. राजगड पोलिसांनी याबाबत तातडीने तपास करत याप्रकरणी पाचही आरोपींना ताब्यात घेऊन अटक केली. घटनास्थळी उपविभागीय पोलिस अधिकारी राजेंद्रसिंह गौर यांनी भेट देऊन पोलिस निरीक्षक राजेश गवळी व सहाय्यक पोलिस निरीक्षक तुकाराम राठोड यांना तपासा संबंधी सूचना दिल्या.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.