खेड शिवापूर, ता. ४ ः प्रवासी बसमध्ये बेकायदा विदेशी दारूची वाहतूक करत असताना राजगड पोलिसांनी खेड शिवापूर टोल नाक्यावर प्रवासी बस व चालकाला ताब्यात घेतले आहे. विजय मुथ्थय्या पट्टन (वय ५२, रा. नालासोपारा, मुंबई) असे बस चालकाचे नाव आहे. पोलिस कर्मचारी प्रशांत राऊत यांनी या बाबत फिर्याद दाखल केली आहे. खेड शिवापूर टोल नाक्यावर नियमित तपासणी करत असताना सोमवारी (ता. १) रात्री साडेदहा वाजण्याच्या सुमारास राजगड पोलिसांनी बस (क्र. एमएच ०३ ई एस ५४०९) तपासणी केली. यावेळी बस चालक पट्टन हा बेकायदेशीरपणे विदेशी दारूची वाहतूक करत असल्याचे निदर्शनास आले. बसमधून पोलिसांनी वेगवेगळ्या १३४ व ४७ दारूच्या १५ हजार ३८५ रुपयांच्या बाटल्या जप्त केल्या. दारू वाहतूक करणारी २० लाख रुपये किमतीची बसही पोलिसांनी ताब्यात घेतली आहे. या बाबत पुढील तपास पोलिस हवालदार ए. आय. मेस्त्री करीत आहेत.