नसरापूर, ता. १९ ः पुणे- सातारा महामार्गावरील नसरापूर- चेलाडी फाटा (ता. भोर) येथील उड्डाणपुलाखालील रस्त्यावर वाहनांचे अवैधरीत्या पार्किंग केले जात आहे. त्यामुळे येथून नसरापूरकडे ये- जा करणाऱ्या वाहनांना तसेच एसटी बस, पीएमपीएल बस यांना अडथळा निर्माण होत आहे.
महामार्गावर नसरापूर येथील उड्डाणपूल हा सर्वात मोठा उड्डाणपूल आहे. या ठिकाणावरूनच राजगड तालुक्यासाठी रस्ता असल्याने या ठिकाणी वाहनांची मोठी वर्दळ असते. यासाठी पुलाखाली तब्बल चार पदरी रस्ता आहे. एवढा मोठा रस्ता असूनही या ठिकाणी वाहनांना अडथळा निर्माण होत आहे.
या पुलाखालील मार्गिकेमध्ये दोन्ही बाजूला अवैध प्रवासी वाहतूक करणारी वाहने, तसेच परिसरातील हॉटेलमध्ये थांबलेल्या ग्राहकांच्या गाड्या दिवसभर लावलेल्या असतात. त्यामुळे नागरिकांना रस्त्याच्या मधून चालावे लागते. पुलाखाली लावलेली वाहने काढण्यास सांगितल्यास वाहनचालक अरेरावीची भाषा करतात.
या बाबत राजगड पोलिस वाहतूक विभाग शाखेने दंडात्मक कारवाई करावी. तसेच, या ठिकाणी महामार्ग प्राधिकरणाने वाहने लावण्यास सक्त मनाई असल्याचे फलक लावावेत, अशी मागणी प्रवासी व नागरिकांनी केली आहे.

05809