नसरापूर, ता. २४ : येथील बँक आँफ महाराष्ट्र शाखेमधील काही कर्मचाऱ्यांच्या अनुपस्थितीमुळे पैसे देणे घेणे व्यवहार होऊ न शकल्याने दिवसभर बँकेचे कामकाज ठप्प झाले होते.
यामुळे ग्राहकांची मोठी गैरसोय झाली.
बँक ऑफ महाराष्ट्रच्या नसरापूर (ता. भोर) शाखेमध्ये गेले अनेक दिवस कर्मचाऱ्यांच्या कामकाजाबाबत ग्राहकांमध्ये नाराजी आहे. हिंदी भाषिक कर्मचारी जबाबदारी घेऊन काम करत नसल्याच्या तक्रारी आहेत त्यामध्येच रविवारी (ता. २३) च्या सुट्टीनंतर सोमवारी (ता. २४) बँकेत ग्राहकांची मोठी गर्दी असताना बँकेतील दोन्ही रोखपाल (कॅशिअर) अनुपस्थित होते त्यामुळे पैसे काढणे, ठेवण्यासाठी आलेल्या ग्राहकांची मोठी अडचण झाली. फक्त दोन हिंदी भाषिक महिला कर्मचारी यावेळी उपस्थित होत्या, त्यांना रोखपालाचे काम करण्याची ग्राहकांनी विनंती केली असता आम्हाला ते काम येत नसल्याचे सांगून त्यांनी रोकड काउंटर (कॅशिअर काउंटर) चक्क बंद ठेवले. याबाबत बँकेमध्ये माहिती घेतली असता दोन रोखपाल कर्मचाऱ्यांपैकी एका महिलेने रीतसर रजा घेतली होती तर दुसऱ्या कर्मचारी महिलेची अचानक प्रकृती बिघडल्याने त्या अनुपस्थित राहिल्या. तसेच बँकेचे व्यवस्थापक देखील रजेवर होते त्यामुळे बँकेत फक्त दोनच कर्मचारी राहिल्या व त्यांनी जबाबदारी स्वीकारण्यास नकार दिल्याने ग्राहकांची मोठी गैरसोय झाली. याबाबत नसरापूर ग्रामपंचायतीने देखिल दखल घेत बँकेच्या व्यवस्थापकासह वरिष्ठांकडे पत्र पाठवून बँकेच्या कामकाजाबद्दल तीव्र नाराजी व्यक्त करत कामकाजामध्ये सुधारणा करण्याची दक्षता घेण्याच्या सूचना केल्या आहेत.

6007