नसरापूर, ता. ८ ः शिवरे (ता. भोर) येथील अखंड हरिनाम सप्ताहाची संत नामदेव महाराज यांचे वंशज ज्ञानेश्वर महाराज नामदास यांच्या काल्याचे कीर्तनाने सांगता झाली. शिवरे येथील श्री पांडुरंग प्रासादिक मंडळाच्या वतीने अखंड हरिनाम सप्ताहाचे आयोजन करण्यात आले.
या सप्ताहात महादेव ढाकणे, वैभव राक्षे, केशव हगवणे, तुकाराम शास्त्री, पुंडलिक देहूरकर, ज्ञानेश्वर शिंदे, मयूर कोंडे, श्रीराम सोलापूरकर यांची कीर्तनसेवा पार पडली. तसेच, परिसरातील गोगलवाडी, शिंदेवाडी, ससेवाडी, वेळू, कांजळे, साळवडे, केळवडे, खोपी, खेड शिवापूर, गाऊडदरा, वरवे, राहठवडे, कुसगाव, आर्वी येथील भजनी मंडळांनी सप्ताहात भजन सेवा केली. दररोज प्रणय घ्यार याचे प्रवचन झाले.
उद्योजक धनेश डिंबळे यांच्या वतीने मंदिर सजावट व कालातोरण करण्यात आले. हार, फुलांची व्यवस्था निखिल डिंबळे यांच्या वतीने करण्यात आली. अनिल दळवी, गणपत डिंबळे, तानाजी डिंबळे, सूर्यकांत पायगुडे, विनायक भोसले, बाळासाहेब उबाळे, संतोष कारकर, डॉ. राजेंद्र डिंबळे, मयूर खंडागळे, शुभम शेडगे आदी ग्रामस्थांनी नियोजनात सहकार्य केले.
कार्यक्रमात वारकरी संप्रदायाचे पालन करून नित्यनियमाने भक्ती करणारे शिवरे गावातील ९८ वर्षीय विठ्ठल गोपाळा डिंबळे व त्यांची ९० वर्षीय पत्नी भागूबाई या ज्येष्ठ दांपत्याचा नागरी सत्कार करण्यात आला.

06040