नसरापुर, ता. ५ ः खेळण्यासाठी चाललेल्या लहान मुलास अडवून ‘‘तुझे तोंड बंद ठेव नाहीतर तुला मारून टाकीन’’ अशी धमकी देऊन त्याच्यावर ब्लेडने वार करण्यात आले. या प्रकरणी मुलाचे वडील अमृत हरिश्चंद्र अहिरे (वय ३६ रा. किकवी) यांनी राजगड पोलिस ठाण्यात फिर्याद दिली. त्यानुसार, दोघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, शनिवारी (ता. ३) दुपारी अडीचच्या सुमारास किकवी येथे पंचशिलनगरकडे जाणाऱ्या पुलावर अमृत यांचा मुलगा चैतन्य हा खेळण्यासाठी छत्रपती शिवाजी विद्यालयाकडे जात होता. यावेळी साहिल क्षीरसागर (पुर्ण नाव माहीत नाही) (रा. किकवी) व त्याचा साथीदार (नाव, पत्ता माहीत नाही) यांनी काळ्या रंगाच्या मोटार सायकलवर येऊन चैतन्य यास धमकी दिली. त्याला मारहाण करून त्याच्यावर ब्लेडने वार केले आणि शिवीगाळ, दमदाटी करून मोटारसायकलवर निघुन गेले. या प्रकरणी दोघांवर गुन्हा दाखल झाला असून राजगड पोलिस ठाण्यातील हवालदार राहुल कोल्हे पुढील तपास करीत आहेत.