न्हावरे, ता. ४ ः आंबळे (ता. शिरूर) येथील कुलदैवत भैरवनाथ व हनुमान जयंतीनिमित्त भरविण्यात आलेल्या आखाड्यात २०० मल्लांनी सहभाग नोंदवला. ग्रामस्थांना नेत्रदीपक व निकाली कुस्ती पहावयास मिळाल्या. शेवटची कुस्ती प्रतीक बेंद्रे व अथर्व चव्हाण यांच्यामध्ये ५१ हजार रुपयांवर लावण्यात आली होती. कुस्ती बरोबरीत सुटल्यामुळे दोन्ही मल्लांना समान बक्षिस वाटप करण्यात आले.
गुरूवारी (ता. २) यात्रेच्या पहिल्या दिवशी पहाटे हनुमान जन्मोत्सवानिमित्त संगीत भजन झाले. त्यानंतर छकड्यांची शर्यत झाली. दुपारी भैरवनाथाला दंडवत घालण्याचा कार्यक्रम झाला. रात्री देवाचा छबिना काढण्यात आला. त्यानंतर रात्री उशिरा “जिवाचं पाखरू” ऑर्केस्ट्रा हा मनोरंजनाचा कार्यक्रम झाला.
शुक्रवारी (ता. ३) वस्ताद मच्छिंद्र गायकवाड यांच्या स्मरणार्थ अडीच लाख रुपये खर्च करून श्रीकांत गायकवाड व प्रमोद गायकवाड यांनी आखाडा बांधून दिला. त्यामध्ये प्रथमच कुस्त्या पार पडल्या. ठरलेल्या इनामांपैकी चितपट कुस्ती करणाऱ्या मल्लांना ७५ टक्के बक्षिस रक्कम तर हरलेल्या मल्लाला २५ टक्के देण्यात येत होती.