निरगुडसर, ता.३ : रांजणी (ता.आंबेगाव) येथील वनविभाग अंतर्गत असलेल्या जंगलामध्ये वन्य प्राण्यांसाठी पिण्यासाठी बनवलेले पाणवठे कोरडे ठणठणीत पडले आहेत. यामुळे वन्यप्राण्यांचे पाण्याअभावी मोठे हाल होत आहे. तरी वन विभागाने तातडीने वन्य प्राण्यांना पिण्यासाठी कोरड्या पडलेल्या पाणवठ्यात पाणी सोडण्याची मागणी वन्यप्रेमींकडून केली जात आहे.
रांजणी वनविभाग अंतर्गत असलेल्या परिक्षेत्रात वन्य प्राण्यांची तहान भागवण्यासाठी दोन पाणवठे तयार करण्यात आले आहेत. परंतु मार्च उजाडला तरी अद्याप त्यामध्ये पाणी न सोडल्यामुळे पाणवठे कोरडे पडले आहेत. यामुळे वन्य प्राण्यांचे पाण्याअभावी हाल होत आहेत. या परिसरात मोर, लांडगे, कोल्हे, ससे, बिबटे आदी वन्यप्राणी मोठ्या प्रमाणात वावरतात. परंतु सध्या मार्च हीट सुरू असल्यामुळे उन्हाचा तडाखा वाढला आहे. वन्य प्राण्यांना पाण्यासाठी वन फिरावे लागत आहे.
दरम्यान, वनविभागाने पाणवठ्यांत पाणी सोडण्याची मागणी वन्यप्रेमींसह नागरिकांनी केली आहे.

01368