निरगुडसर, ता.११ : नागापूर (ता.आंबेगाव) येथील शेतकरी नामदेव मल्हारी मंचरे यांनी घरासमोरील झाडाखाली लावलेली मोटारसायकल अज्ञात चोरट्याने हॅन्डल लॉक तोडून चोरून नेली. ही घटना बुधवारी (ता.२९ मे) रात्री घडली. याबाबत मंचरे यांनी सोमवारी (ता.१०) फिर्याद दिली. त्यानुसार पारगाव पोलिसांनी अज्ञात चोरट्या विरोधात गुन्हा दाखल केला आहे.
मंचरे यांनी काळ्या रंगाची निळा पट्टा असलेली हिरोहोंडा कंपनीची स्प्लेन्डर प्लस मॉडेलची मोटार सायकल नं. एम.एच.१४ ई.एल.८४२९ ही मोटार सायकल लावली होती. अज्ञात चोरट्याने ता.२९ ते ३० मे दरम्यान सकाळी आठ या दरम्यान घडली आहे. याबाबत मंचरे यांनी गाडीचा खूप शोध घेऊन मिळून न आल्याने त्यांनी पारगाव पोलिस ठाण्यात फिर्याद दिली. दरम्यान, वर वर्णन केलेली दुचाकी आढळल्यास पारगाव पोलिस ठाण्याला माहिती द्यावी, असे आवाहन करण्यात आले आहे. पुढील तपास सहाय्यक पोलिस निरीक्षक नेताजी गंधारे यांच्या मार्गदर्शनाखाली पारगाव पोलिस करीत आहे.