निरगुडसर, ता. २० ः सात वाजताच बिबट्या घराच्या उंबऱ्यावर येत असल्याने सर्वांना सातच्या आत घरात म्हणण्याची वेळ आली आहे. निरगुडसर (ता. आंबेगाव) येथील नहयारमळा परिसरात बिबट्याचा वावर वाढल्याने भीतीचे वातावरण पसरले आहे.
येथील सुनील भेके यांच्या घराजवळ रविवारी (ता. १९) सात वाजता बिबट्या येऊन रस्ता ओलांडून उसाच्या शेतात पसार झाला. भेके यांच्या घराजवळ सलग तीन वेळा बिबट्या आला आहे. तसेच, भराडी फाटा परिसरात बिबट्याचे दर्शन होत आहे. रविवारी धर्मराज वळसे यांच्या घराजवळ रात्री नऊ वाजता बिबट्या आला होता.
मंचर वनपरिक्षेत्र अधिकारी विकास भोसले यांनी सोमवारी (ता. २०) सकाळी भेके यांच्या घरी येऊन बिबट्याबाबत माहिती घेतली आणि परिसरात पाहणी केली. यावेळी बिबट मादी आणि पिल्लाचे ठसे घराजवळ आणि शेतात आढळले. यावेळी भोसले म्हणाले की, ‘‘अवघे २० पिंजरे आहेत आणि ते लावलेले असून, एक पण पिंजरा शिल्लक नाही, तरी पिंजरा लावण्याची व्यवस्था करू.’’ यावेळी वनरक्षक अश्विनी डफळ, पूजा पवार, रेस्क्यू पथक सदस्य आदी कर्मचारी उपस्थित होते.

02909