निरगुडसर, ता. २० ः वळती (ता. आंबेगाव) येथे शिवनेरी गडावरून गुरुवारी (ता. १९) गावात शिवज्योतीचे उत्साहात स्वागत करण्यात आले. शिवज्योत उत्सवाचे यंदा ११वे वर्ष आहे.
शिवनेरीवरून शिवज्योतीचे प्रथम भोकरवस्ती येथे आगमन झाले. त्यानंतर शिवज्योत ढोल ताशाच्या गजरामध्ये वळती गावात आणण्यात आली. रस्त्यामध्ये अनेक शिवभक्त महिलांनी सडा- रांगोळी टाकून शिवज्योतीचे पूजन केले. गावात भव्यदिव्य प्रवेशद्वार व अश्वारूढ पुतळा असून पुतळ्याला फुलांची आरास सजावट व विद्युत रोषणाई केली होती. यावेळी छत्रपती शिवाजी महाराजांच्या अश्वारूढ पुतळ्याला पुष्पहार अर्पण करण्यात आला. शिवनेरी किल्ल्यावरून शिवज्योत घेऊन आलेल्या सर्व शिवभक्तांचे ग्रामस्थांनी विशेष कौतुक केले.
यावेळी प्राथमिक शाळा वळती, भोकरवस्ती, तसेच भक्तीशक्ती वारकरी संस्था कळंब या संस्थेच्या विद्यार्थ्यांनी सहभाग घेतला. या विद्यार्थ्यांनी नेत्रदीपक लेझीम खेळाचे प्रदर्शन केले. जिल्हा परिषद शाळेचे मुख्याध्यापक अशोक मावळे व स्नेहल लोखंडे, तसेच शिक्षक बाळासाहेब इंदोरे, अंगणवाडी सेविका सुनंदा भोर व अश्विनी भोर यांनी परिश्रम घेतले. यावेळी भोकरवस्ती परिसरातील महिलांनी एकाच वेशभूषेत सहभाग घेऊन लेझीम खेळाचे प्रदर्शन केले. कार्यक्रमानंतर सर्व शिवभक्तांना महाप्रसादाचे वाटप करण्यात आले.

03149