नीरा नरसिंहपूर, ता.१३ : पिंपरी बुद्रुक (ता. इंदापूर) गावचे ग्रामदैवत पीरसाहेब (उदगीरबाबा) यांचा उरसास आजपासून सुरुवात झाली आहे. त्यानिमित्ताने दर्गाहवरती आकर्षक, मनमोहक अशा पध्दतीने विद्युत रोषणाई करण्यात आली आहे. त्याची भुरळ तरुणाईसह अबालवृद्ध, महिला व बालकांना पडली आहे.
ग्रामस्थांच्या वतीने आज सोमवारी सायंकाळी नऊ वाजता संदलची सामूहिकरीत्या गावातून वाजत गाजत मिरवणूक काढून, ती पिरसाहेबांच्या मजारवर चढवण्यात येणार आहे. उरसानिमित्त गावात स्वच्छता करण्यात आली असून गावाच्या सार्वजनिक खांबावर बल्ब बसवून गाव चकमक चमकवण्यात आले आहे. पिरसाहेबाच्या मजारसह दर्गाहवर आकर्षक विद्युत रोषणाई करण्यात आली आहे. सायंकाळच्या वेळी दर्गाह परिसर विद्युत रोषणाईमुळे झगमगून गेले आहे.
यात्रेनिमित्त खेळणी, फुगेवाले, बांगडी दुकाने, आईस्क्रीम, पायनापल, मेवा मिठाईची दुकाने थाटण्यात सुरवात झाली आहे. मागील चार वर्षांच्या कोरोना काळानंतर प्रथमताच एवढ्या मोठ्या प्रमाणात उरुस भरणार असल्याने सर्वत्र उत्साह पहावयास मिळत आहे.

03206