नीरा नरसिंहपूर, ता. २७ ः सराटी (ता. इंदापूर) येथील पुलाचे काम दोन वर्षांनंतरही रखडले आहे. तसेच सराटी ते गणेशवाडी मार्गावर ठिकठिकाणी पाइपलाइनचे खड्डे पडल्याने रस्ता खचला आहे. पालखीच्या पार्श्वभूमीवर काम होणार की रखडणार? बांधकाम विभागाच्या उपअभियंत्यांना पालखी मार्गाच्या कामासाठी वेळ मिळणार का? असा प्रश्न नागरिक आणि प्रवाशांना पडला आहे.
सराटी- गणेशवाडी या संत शिरोमणी नरहरी सोनार पालखी मार्गाचे काम अनेक वर्षांच्या मागणीनंतर करण्यात आले. पाच किलोमीटर मार्गाच्या कामाला कोट्यवधी रुपयांचा निधी वापरण्यात आला. त्यापैकी सराटीकडूनच्या पहिल्याच पुलाचे काम दोन वर्षांनंतरही रखडवलेलेच आहे. तर मार्गाचे काम घाईगडबडीत पूर्ण करण्याने खचू लागला आहे. पाच किलोमीटरचे काम दोन ठेकेदारांमार्फत करण्यात आले आहे. परंतु दीड वर्षातच रस्त्याची दुरवस्था झाल्याने याला जबाबदार कोण? असा सवाल नागरिक करीत आहे.
क्रीडामंत्री दत्तात्रेय भरणे यांनी गणेशवाडी, सराटी ते निरनिमगाव या मार्गासाठी नऊ कोटीचा निधी मंजूर केला. परंतु सार्वजनिक बांधकाम विभागाच्या अधिकाऱ्यांच्या दुर्लक्षामुळे ठेकेदारांनी घाई गडबडीत काम करून बिल काढून घेतले. त्यामुळे लगेचच ठिकठिकाणी रस्ता उघडला व खचला असून, खड्डेही पडलेले आहेत.
सराटी- गणेशवाडी पाच किलोमीटर रस्त्यावर पाणी निचऱ्यासाठी एकाही ठिकाणी पाइप टाकण्यात आलेला नसल्याने पावसाळ्यात रस्त्यावर पाणी साचत आहे. त्यामुळे या कामाची चौकशी करून कर्मचारी, अधिकारी व ठेकेदार यांच्यावर कारवाई करण्याची मागणी नागरिकांनी केली आहे.