नीरा नरसिंहपूर, ता. २५ ः गणेशवाडी (ता. इंदापूर) येथील पुलाजवळ रस्त्यावर पडलेली धोकादायक चारी व खड्डे बुजविण्यात आले आहेत. याबाबत ‘सकाळ’ने वृत्त प्रसिद्ध करताच सार्वजनिक बांधकाम विभागाने याची दखल घेतल्याने प्रवासी व नागरिकांनी ‘सकाळ’चे आभार मानले आहेत.
बावडा- नरसिंहपूर मार्गावरील गणेशवाडी गावालगतच्या पुलाजवळील रस्त्यावर मोठी आडवी चारी व रस्त्यावर खड्डे पडले आहेत. रात्री अपरात्री प्रवास करणाऱ्या प्रवाशांना चारी आणि खड्ड्यांचा अंदाज न आल्याने अपघातात एकाला जीव गमवावा लागला आहे. तसेच, छोटे- मोठे अपघातही झाले आहेत. सार्वजनिक बांधकाम विभागाचे कर्मचारी, अधिकारी मात्र निद्रिस्त अवस्थेत असल्याचे वृत्त ‘सकाळ’मध्ये प्रसिद्ध झाले होते.
बावडा- नरसिंहपूर राज्य मार्गाचे चार वर्षांपूर्वी काम पूर्ण करण्यात आले. तेव्हापासून आजतागायत ठेकेदार, कर्मचारी व अधिकारी याच्या देखभाल दुरुस्ती करण्याकरिता फिरकलेच नाहीत. त्यामुळे अनेक ठिकाणी रस्ता खचला व उखडला असून, अनेक ठिकाणी खड्डे पडल्याने वाहनांना अपघात होऊन नागरिकांना दुखापतीला सामोरे जावे लागत होते. रात्रीच्यावेळी रस्त्यावरून प्रवास करताना चारीचा अंदाज न आल्याने गाड्यांवरून महिला व ग्रामस्थ उडून पडल्याने गंभीररीत्या जखमी झाले आहेत. सामाजिक कार्यकर्ते अश्वजित कांबळे व विशाल कांबळे यांनी यासंदर्भात सार्वजनिक बांधकाम विभागाला आंदोलनाचा इशारा दिला होता. तसेच, ‘सकाळ’च्या माध्यमातून आवाज उठवला होता. त्याची तातडीने दखल घेऊन येथील खड्डे बुजविण्यात आले आहेत.