नीरा नरसिंहपूर, ता.२१ : पुणे परिसर व घाट माथ्यावरील पावसाचे व धरणातील पाणी मोठ्या प्रमाणात येत आहे. तसेच दौंड येथून उजनीत एक लाख ७६ हजार क्युसेकचा विसर्ग येत आहे. त्यामुळे उजनी धरणातून भीमा नदी पात्रात एक लाख ५१ हजार क्युसेकचा विसर्ग सोडला जात आहे. तर नदी काठावरील पिकात पाणी घुसल्याने शेतकऱ्यांचे मोठे नुकसान झाले आहे. गणेशवाडी पुलावर दहा फूट पाणी वाहत असल्याने पुलावरील वाहतूक दुसऱ्या दिवशीही बंद ठेवली आहे.

भीमा नदी काठावरील इंदापूर व माढा तालुक्यातील गावातील शेतात पुराचे पाणी घुसल्याने ऊस, केळी, मका, कडवळ, पेरू पिके पाण्याखाली गेली आहेत. त्यामुळे प्रचंड मोठ्या प्रमाणात नुकसान झाले आहे. तर मोटारी, पाइप, स्टार्टर, प्लास्टिक पिंप, फ्यूज पेट्याही पुराच्या पाण्यात गेल्याने शेतकऱ्यांचे अतोनात नुकसान झाले आहे. शासनाने पिकांचे व इतर साहित्याचे पंचनामे करून नुकसान भरपाई देण्याची मागणी होत आहे.
पुरनियंत्रणाच्या दृष्टिकोनातून उजनी धरणातून बुधवारी (ता.२०) रात्री नऊ वाजता एक लाख २५ हजार क्युसेकचा विसर्ग करण्यात आला. त्यामध्ये गुरुवारी (ता२१) पहाटे साडेपाच वाजता वाढ करून एक लाख ३० हजार क्युसेक्स करण्यात आला. त्यामध्ये सकाळी दहा वाजता एक लाख ४० हजार क्यूसेक करण्यात आला आहे.
भीमा नदीवरील गणेशवाडी - गारअकोले पूल कालपासून पाण्याखाली गेला असून पुन्हा नदीत पाणी वाढविल्याने पुलावर जवळपास दहा ते बारा फूट पाणी वाहत आहे. त्यामुळे यावरील वाहतूक आज दुसऱ्या दिवशीही बंदच ठेवण्यात आली आहे.

प्रशासनाकडून अद्याप पाहणी नाही
भांडगाव, टणू, नरसिंहपूर येथील कोल्हापुरी पध्दतीचे बंधारेही पाण्याखाली गेले आहेत. नरसिंहपूर येथील भीमा व नीरा नदीवरील पुलाला पुराचे पाणी टेकले असल्याने त्याला बघण्यासाठी नागरिकांनी मोठी गर्दी केली आहे. प्रशासनाच्या वतीने कोणीही अद्याप पाहणी करण्यास आले नाही तसेच सुरक्षेच्या दृष्टिकोनातून कोणतीही उपाययोजना करण्यात आली नाही.

04992, 04993

---------------------------