नीरा नरसिंहपूर, ता. ४ : महसूलमंत्र्यांच्या घोषणेने राज्यातील मुद्रांक विक्रेते व दस्त लेखनिकांवर उपासमारीची वेळ येणार असून हजारो संसार उघड्यावर पडणार आहेत. त्यामुळे राज्यस्तरीय अधिवेशनात शासनाच्या निर्णयाविरोधात पुढील दिशा व धोरण ठरविण्यात येणार असल्याचे महाराष्ट्र राज्य मुद्रांक विक्रेता दस्त लेखनिक संघटनेचे अध्यक्ष शंकर भिसे यांनी सांगितले.
घरबसल्या इ-स्टॅम्प खरेदी, दस्त लेखनी करिता कोणत्याही मुद्रांक विक्रेत्यांकडे जाण्याची गरज नसून पेपर बॉण्ड ऐवजी इलेक्ट्रॉनिक बॉण्डचा वापर करण्याचे वक्तव्य महसूलमंत्री चंद्रशेखर बावनकुळे यांनी नुकतेच केले आहे. त्यामुळे राज्यातील मुद्रांक विक्रेते व दस्त लेखनिकांवर उपासमारीची वेळ येणार आहे.
पंढरपूर येथे सोलापूर जिल्हा मुद्रांक विक्रेता दस्त लेखनिक संघटनेच्या वतीने ‘राज्यस्तरीय अधिवेशनाचे’ आयोजन रविवारी सकाळी ११ वाजता केले असल्याचे तनवीर खान व जावेद चौधरी यांनी सांगितले.
या अधिवेशनात त्यावर सखोल चर्चा करून पुढील दिशा व धोरण ठरविले जाईल, पंढरपूर येथील नवीन कराड नाका हॉटेल सहारा शेजारी रसोई गार्डन येथे राज्यातील सर्व जिल्हा संघटनेचे पदाधिकारी व मुद्रांक विक्रेते उपस्थित राहणार आहेत. यावेळी इतर अडचणी, समस्या व मागण्या संदर्भातही सखोल चर्चा होणार असल्याने सर्व मुद्रांक विक्रेते व लेखनिकांनी मोठ्या संख्येने उपस्थित राहावे, असे आवाहन भिसे यांनी केले आहे.