ओतूर : २५ : पिंपरीपेढार (ता.जुन्नर) येथील गटवाडी येथे भरदिवसा सहा तोळे सोन्याच्या दागिन्यांची सुमारे दोन लाख ३२ हजार रुपयाचा ऐवज चोरीला गेला. ही घटना मंगळवारी (ता.२४) दुपारी सव्वा दोन वाजेच्या सुमारास घडली. याबाबत ओतूर पोलिसात पिंपरीपेंढार येथील गटवाडीमधील अमित दत्तात्रेय कुटे यांनी तक्रार दिली असून, पोलिसांनी अज्ञात चोरट्यांवर गुन्हा दाखल केला आहे.
चोरीबाबत अधिक माहिती अशी की, अमित कुटे हे राहत असलेल्या त्यांचे घरी चोरी झाल्याचे त्यांना फोनवर समजल्यावर त्यांनी घरात जाऊन पाहिले असता झोपण्याच्या खोलीमधील कपाटाच्या कप्प्यातील साहित्य अस्ताव्यस्त पडलेले दिसले. तसेच बिछाण्यावर पाहिले असता दागिण्यांचे रिकामे बॉक्स अस्ताव्यस्त पांगलेले दिसले. यावेळी शेजारी राहणारे निखिल मस्करे यांनी त्यांना सांगितले की, तोंडाला लाल रंगाचा मास्क असलेली व्यक्ती तुमच्या घरात दोन ते तीन वेळा आत बाहेर ये-जा करत असलेली दिसली. त्यामुळे मला त्या व्यक्तीचा संशय आल्याने मी पटकन माझी कपडे घालून घराच्या दारात गेलो असता तुमच्या दारातील युनिकॉर्न मोटार सायकलवर तिघेजण ट्रिपलसिट बसून हायवे रोडचे दिशेने वेगात निघून गेले.
दरम्यान, चोरीत कुटे यांच्या घरातील कपाटात ठेवलेले एक लाख ५ हजार रुपये किमतीचे तीन तोळ्याचे मणी मंगळसूत्र, एक लाख ५ हजार रुपये किमतीचा तीन तोळ्याचा राणीहार १७ हजार ५०० रुपयांचे अर्ध्या तोळा वजनाचे सोन्याचे वाटीमणी तीन हजार ५०० रुपये किमतीचे अर्धा ग्रॅमचे पानाचे आकाराचे छोटे पेंडंट आणि एक हजार रुपयांची रोकड असा मिळून एकूण दोन लाख ३२ हजार रुपयांचा मुद्देमाल चोरीस गेला आहे. पुढील तपास पोलिस करीत आहे.
00347