ओतूर, ता. २५ : डिंगोरे (ता. जुन्नर) येथील ग्रामविकास मंडळ ओतूर संचलित पुष्पावती विद्यालयात जिल्हा परिषद पुणे व माध्यमिक शिक्षण विभाग यांच्या वतीने राबविण्यात येत असलेल्या दहा कोटी वृक्ष लागवड उपक्रमांतर्गत विद्यार्थ्यांनी वृक्षारोपण केले.
याबाबत माहिती देताना मुख्याध्यापक शरद माळवे म्हणाले की, ‘‘विद्यार्थ्यांनी ‘एक पेड माँ के नाम’ या घोषवाक्याला अनुसरून प्रत्येकाने आपल्या आईच्या नावाने एक झाड लावले असून, त्या झाडाचे संगोपन करण्याची आणि त्याची संपूर्ण वाढ होईपर्यंत काळजी घेण्याची शपथ घेतली आहे.’’
पुणे जिल्हा परिषद शिक्षण विभाग वृक्षलागवडीनंतर वृक्ष संरक्षण मोहीमही राबवीत आहे. यासाठी वन विभागाने विविध प्रकारची रोपे उपलब्ध करून दिली आहेत. या उपक्रमाचे नियोजन दत्तात्रेय घोलप, किसन भुतांबरे, जगन्नाथ गाढवे, वैभव देशमुख, दीपा सावंत, साधना तांबे, दिनेश पाटील, रतिलाल बागूल, शिवाजी उकिर्डे आदींनी केले.