ओतूर, ता. २१ : जुन्नर तालुक्यातील ओतूर व माळशेज पट्ट्यातील ग्रामीण भागात घरगुती गॅस सिलिंडरचा तीव्र तुटवडा जाणवत आहे. दोन सिलिंडरच्या नोंदणीतील अंतर ४५ दिवस केल्याने इंधनाचे संकट उभे राहिले असून, पर्याय म्हणून गृहिणींना पुन्हा चुली पेटवाव्या लागत आहेत.
ग्रामीण भागात एकेकाळी ''धूरमुक्त स्वयंपाकघर'' मोहिमेमुळे उज्ज्वला गॅस योजनेला मोठा प्रतिसाद मिळाला. मात्र, आता गॅस वितरण कंपन्यांनी ग्रामीण भागासाठी दोन सिलिंडरमधील अंतर ४५ दिवस केल्याने ग्राहकांची अडचण झाली आहे. विशेषतः ग्रामीण भागात एकत्र कुटुंब पद्धती असल्याने एक सिलिंडर साधारण २० ते २५ दिवसच पुरतो. उर्वरित दिवसांच्या इंधनाचा प्रश्न नागरिकांसमोर उभा ठाकला आहे. तसेच लग्नसोहळे, धार्मिक विधी आणि इतर सार्वजनिक कार्यक्रमांसाठी गॅस उपलब्ध होत नसल्याने पुन्हा लाकूडफाटा आणि जंगलतोडीचा धोका वाढला आहे.

गॅस कंपन्यांकडून ग्रामीण आणि शहरी असा भेदभाव केला जात आहे. शहरात २५ दिवसांनी सिलिंडर मिळतो, मग ग्रामीण भागावर ४५ दिवसांच्या अंतराची सक्ती अन्यायकारक आहे. या धोरणामुळे वृक्षतोड वाढून पर्यावरणाची हानी होत आहे. कंपन्यांनी ग्रामीण भागातही २५ दिवसांच्या अंतराने गॅस पुरवठा करावा.
- तानाजी तांबे, सामाजिक कार्यकर्ते