पाबळ, ता. ३ : पिकअप वाहनामधून दाटीवाटीने कोंबून चालविलेल्या सात जनावरांची बजरंग दलाच्या सतर्कतेमुळे पाबळ (ता. शिरूर) येथून सुटका झाली. हे गोवंश कत्तलीसाठी घेऊन जात असल्याचा आरोप गोरक्षकांनी केला.
पाबळ येथील केंदूर रस्त्याने पिकअपमधून काही जनावरे कत्तलीसाठी जाणार असल्याची माहिती बजरंग दलाच्या कार्यकर्त्यांना मिळाली. त्यांनतर ऋषिकेश नऱ्हे, कुणाल थिटे, दिनेश झोडगे, पियुष चौधरी, जितेंद्र जाधव हे पाबळ गावात थांबलेले असताना त्यांना पिकअपमध्ये (क्र. एमएच १४ जेएल २९१५) सात जनावरे दाटीवाटीने बांधून घेऊन चालल्याचे निदर्शनास आले. त्यांनी पिकअपसह चालकाला पोलिसांच्या ताब्यात दिले.
याबाबत ऋषिकेश श्यामराव नऱ्हे (वय २३, रा. नऱ्हे बेंद, पाबळ) यांनी शिक्रापूर पोलिस ठाण्यात फिर्याद दिली. पोलिसांनी प्रकाश धोंडीबा गावडे (वय ३३, रा. थूगाव, ता. आंबेगाव) आणि इनामअली हसनअली इनामदार (वय ५४, रा. मंचर) या दोघांवर गुन्हा दाखल करत त्यांना अटक केली.
याबाबत पुढील तपास पोलिस निरीक्षक दिपरतन गायकवाड यांच्या मार्गदर्शनाखाली सहाय्यक पोलिस उपनिरीक्षक राजेंद्र बनकर करत आहे.