कवठे येमाई, ता. १३ : सविंदणे (ता. शिरूर) येथील विहिरीवरील विद्युत पंप, पाइपलाइन व अन्य साहित्याची तोडफोड करून जाळून टाकल्याप्रकरणी शिरूर पोलिसांनी तिघांविरोधात गुन्हा दाखल केला आहे. ही घटना २ फेब्रुवारी ते १९ फेब्रुवारी दरम्यान घडली.
विठ्ठल गेणुजी ढगे हे मांदळवाडी (ता. आंबेगाव) येथे कुटुंबासह वास्तव्यास आहेत. पाण्याच्या टंचाईमुळे त्यांनी सविंदणे (ता. शिरूर) येथे शेतजमीन खरेदी करून विहीर खोदली आहे. मात्र, या विहिरीवरील विद्युत पंप, केबल व इतर साहित्याची अज्ञात व्यक्तींनी तोडफोड केल्याची तक्रार दत्तात्रेय जयसिंग बोऱ्हाडे या शेतमजुराने ३० जानेवारी रोजी टाकळी हाजी पोलिस दुरक्षेत्रात दिली. त्यावरून पोलिसांनी अज्ञात व्यक्तींविरोधात गुन्हा दाखल केला होता. यानंतर १९ फेब्रुवारी रोजी पुन्हा एकदा तोडफोड झाल्याचे आढळून आले. त्यानंतर विठ्ठल ढगे यांनी परिसरातील काही व्यक्तींशी चर्चा केली असता गणेश रामा पोखरकर याने वसंत गहिना पडवळ व चेतन वसंत पडवळ (रा. सविंदणे) यांच्या सांगण्यावरून ही तोडफोड केल्याचे संबंधित व्यक्तीने नाव न सांगण्याच्या अटीवर ढगे यांना सांगितले. याबाबत ढगे यांनी दिलेल्या फिर्यादीवरून शिरूर पोलिसांनी तिघा संशयितांवर गुन्हा दाखल केला. मांदळवाडी येथील खाणकामास विरोध केल्यामुळे राग मनात धरून ही तोडफोड करण्यात आल्याचेही ढगे यांनी फिर्यादीत म्हटले आहे.