कवठे येमाई, ता. १३ : कवठे येमाई (ता. शिरूर) येथे यात्रेदरम्यान जुन्या वादातून एका तरुणावर लोखंडी रॉडने हल्ला केल्याची घटना शनिवारी (ता. १२) घडली. याबाबत संतोष बबन भाईक (वय २४, रा.कवठे येमाई) यांनी शिरूर पोलिस ठाण्यात फिर्याद दिली.
पोलिसांनी दिलेल्या माहितीनुसार, कवठे येमाई (ता. शिरूर) येथे श्री येमाई देवीची पालखी मिरवणूक सुरू असताना संतोष भाईक व त्याचे मित्र उज्वल मुंजाळ, अरविंद तिकोळे, रामदास मुंजाळ आणि भाऊ योगेश भाईक हे पालखीत सहभागी झाले होते. त्यावेळी संतोष ताशा वाजवत असताना संभाजी विष्णू भाईक याने मागील भांडणाचा राग मनात ठेवून लोखंडी रॉडने त्याच्या डोक्यावर व मानेवर हल्ला केला. या हल्ल्यात त्याला दुखापत झाली. याबाबत संतोष यांनी शिरूर पोलिस ठाण्यात फिर्याद दिली. पोलिसांनी संभाजी याच्यावर गुन्हा दाखल केला. पुढील तपास पोलिस निरीक्षक संदेश केंजळे यांच्या मार्गदर्शनाखाली पोलिस हवालदार उबाळे करत आहे.