कवठे येमाई, ता. ११ : कवठे येमाई (ता. शिरूर) येथील मुंजाळवाडीत शुक्रवारी (ता. ९) रात्रीच्या सुमारास बिबट्याने केलेल्या हल्ल्यात शेळी ठार झाली. यामध्ये शेतकरी शत्रुघ्न साहेबराव देवकर यांचे सुमारे १५ हजार रुपयांचे नुकसान झाले आहे.
देवकर यांनी जनावरांसाठी आपल्या घरासमोरील बाजूस गोठ्यालगत दहा फूट उंचीचे तारेचे कंपाउंड उभारले आहे. मात्र, बिबट्याने या उंच तारेवरून उडी मारून आत प्रवेश केला व तीन वर्षांची गाभण शेळी ठार केली. या घटनेची माहिती मिळताच शिरूर वनपरिक्षेत्र अधिकारी निळकंठ गव्हाणे यांच्या मार्गदर्शनाखाली वनपाल गणेश पवार, वनरक्षक नारायण राठोड व वनमजूर हनुमंत कारकूड यांनी घटनास्थळी भेट देऊन पंचनामा केला.
मागील काही दिवसांपासून या परिसरात बिबट्याचे सतत दर्शन होत असल्यामुळे जनावरांवरील हल्ल्यांची मालिका सुरूच आहे. बिबट्याच्या वाढत्या वावरामुळे परिसरातील नागरिकांमध्ये भीतीचे वातावरण पसरले असून वन विभागाने तातडीने पिंजरा लावून बिबट्याला जेरबंद करावे, अशी मागणी शेतकऱ्यांनी केली आहे.