कवठे येमाई, ता. १८ : टाकळी हाजी (ता. शिरूर) पोलिस दूरक्षेत्राच्या हद्दीतील सविंदणे, कवठे येमाई, पिंपरखेड, जांबुत आदी परिसरातील गावांमध्ये अलीकडच्या काही दिवसांत रात्रीच्या वेळेस विद्युत रोहित्र, कृषीपंप, विद्युत केबल आणि अन्य चोरीच्या घटनांत वाढ झाली आहे. याबाबत शेतकऱ्यांनी फिर्यादी दाखल केल्या आहेत. या घटनांमुळे परिसरातील नागरिकांमध्ये भीतीचे वातावरण निर्माण झाले असून, स्थानिक नागरिकांनी पोलिस प्रशासनाकडे रात्र गस्त वाढविण्याची, तसेच ग्राम सुरक्षा यंत्रणा आणि ग्राम सुरक्षा दल सक्रिय करण्याची मागणी केली आहे.
स्थानिक नागरिकांच्या मते, अंधाराचा फायदा घेऊन चोरटे शेतशिवारात धाडसीपणे घुसखोरी करत कृषीपंप, रोहित्र, केबल चोरी करत असून, शेतकऱ्यांचे आर्थिक नुकसान होत आहे. यामुळे शेतकरी हवालदिल झाले आहेत. या पार्श्वभूमीवर पोलिसांनी नियमित रात्र गस्त वाढवून चोरट्यांचा बंदोबस्त करावा आणि गाव पातळीवर ग्राम सुरक्षा यंत्रणा प्रभावीपणे राबवून ग्रामस्थांच्या सहकार्याने चोरीच्या घटनांना आळा घालावा अशी मागणी स्थानिक नागरिकांकडून होत आहे.

वाढत्या चोरीच्या घटना लक्षात घेऊन पोलिस प्रशासनाने गावोगावी ग्राम सुरक्षा दल व ग्राम सुरक्षा यंत्रणा कार्यान्वित करणे आवश्यक आहे. तसेच, पोलिस प्रशासनाने रात्रीच्या वेळी नियमित रात्र गस्त सुरू ठेवून ग्रामस्थांच्या सहकार्याने चोरीच्या घटनांना आळा घालावा.
- प्रदीप पडवळ, ग्रामस्थ, सविंदणे

नागरिकांना रात्रीच्या वेळी अनोळखी व्यक्ती किंवा वाहन संशयास्पदरित्या फिरताना निदर्शनास आल्यास पोलिसांशी संपर्क साधावा. रात्रीच्या वेळी गस्त घालण्याचे काम सुरू आहे. सर्व गावात ग्राम सुरक्षा दल व ग्राम सुरक्षा यंत्रणा कार्यान्वित करण्यात येणार आहे.
- दिलीप पवार, पोलिस उपनिरीक्षक, टाकळी हाजी