कवठे येमाई, ता. २६ : कवठे येमाई (ता. शिरूर) येथील इचकेवाडीमध्ये चोरट्यांनी बंद घराचे कुलूप तोडून सुमारे सव्वादोन लाख रुपयांचा ऐवज चोरून नेला. याप्रकरणी एकनाथ जालिंदर इचके (वय ५६, सध्या रा. खोपोली, ता. खालापूर, जि. रायगड मूळ रा. इचकेवाडी, कवठे येमाई, ता. शिरूर) यांनी शिरूर पोलिस ठाण्यात फिर्याद दिली. चोरट्यांविरोधात गुन्हा दाखल झाला आहे.
एकनाथ इचके हे सध्या खोपोली येथे वास्तव्यास आहेत. त्यामुळे त्यांचे इचकेवाडी येथील घर बंद होते. चोरट्यांनी संधी साधून लोखंडी दरवाजाचे कुलूप तोडले आणि घरात प्रवेश करून कपाटातील १ लाख २६ हजार रुपये रोख रक्कम, सत्तर हजार रुपयांच्या दोन सोन्याच्या अंगठ्या, तसेच २५ हजार रुपये किमतीचे चांदीचे दागिने व भांडी असा सुमारे सव्वा दोन लाख रुपयांचा ऐवज लंपास केला. ही घटना १५ ते २१ जुलैदरम्यान घडली असावी असा अंदाज इचके यांनी व्यक्त केला. पोलिस उपनिरीक्षक दिलीप पवार यांनी घटनास्थळी भेट देत पाहणी केली.