पाबळ, ता. २९ : शास्ताबाद- मलठण रस्त्यावरील लाखेवाडी (मलठण, ता. शिरूर) परिसरात किरकोळ कारणावरून दोन तरुणांनी एका युवतीला व तिच्या भावाला मारहाण केली. तसेच, युवतीचा विनयभंग केला. हा प्रकार बुधवारी (ता. २८) सायंकाळी सव्वापाचच्या सुमारास घडला. याप्रकरणी संकेत संतोष ननवरे व राजेंद्र तळोले (दोघेही रा. कान्हूर मेसाई, ता. शिरूर) यांच्या विरोधात शिरूर पोलिस ठाण्यात गुन्हा दाखल केला आहे.
पोलिसांनी दिलेल्या माहितीनुसार, पीडित युवती आपल्या चुलत भावासह शास्ताबाद येथून मलठणच्या दिशेने मोटारीने जात असताना लाखेवाडी परिसरात समोरून आलेल्या दुसऱ्या मोटारीने (क्र. एम.एच. १२ व्ही.व्ही. १३१२) त्यांच्या वाहनाचा रस्ता अडवला. खड्ड्यांमुळे गाडी थोडीशी बाजूला घ्यावी, असे सांगितल्यावर वादाला तोंड फुटले. यावेळी एक दुचाकीस्वार घटनास्थळी पोहोचला आणि वाद अजून चिघळला. मोटारचालक व दुचाकीस्वार यांनी मिळून पीडित युवती व तिच्या भावाला शिवीगाळ करत मारहाण केली. तसेच, पीडीतेला मोटारीतून ओढून बाहेर काढून केस पकडत, तोंडावर, पोटावर, छातीवर आणि पाठीवर मारहाण केली. तसेच, दुचाकीस्वाराने विनयभंग केला. घटनेनंतर स्थानिक नागरिक जमा होऊ लागल्यावर मारहाण करणाऱ्यांनी पळ काढला. याबाबत पिडीतेने दिलेल्या फिर्यादीवरून संकेत संतोष ननवरे व राजेंद्र तळोले यांच्या विरोधात गुन्हा दाखल केला.