कवठे येमाई, ता. १७ : पुढे चाललेल्या ट्रकवर मागून येणारा दुधाचा टॅंकर आदळल्याने टॅंकरच्या पुढील भागात बसलेल्या एकाच कुटुंबातील तिघांचा दुर्दैवी अंत झाला. कवठे येमाई (ता. शिरूर) गावच्या हद्दीत काळुबाईनगर येथे रविवारी (ता. १७) पहाटे अष्टविनायक महामार्गावर झालेल्या या भीषण अपघातात ट्रक व टॅंकरचालकासह काहीजण जखमी झाले.
शांताबाई मकाजी वाजे (वय ६८), त्यांचा मुलगा ज्ञानेश्वर मकाजी वाजे (वय ३८) व नातू युवांश ज्ञानेश्वर वाजे (वय ५) अशी या अपघातात मृत्युमुखी पडलेल्यांची नावे आहेत. मूळचे वडनेर बुद्रूक (ता. पारनेर) येथील रहिवासी असलेले वाजे कुटुंबीय सध्या मुंबईत वास्तव्यास होते. पोलिसांनी दिलेली माहिती अशी की, एका नातेवाइकाच्या वर्षश्राद्धासाठी ज्ञानेश्वर वाजे हे आई व छोट्या मुलासह दूध वाहतूक करणाऱ्या टॅंकरमधून (क्र.एमएच १६ सीडी ९८१९) निघोज (ता. पारनेर) येथे निघाले होते. अष्टविनायक महामार्गावर कवठे गावच्या हद्दीत बंटी ढाब्याजवळ पुढे चाललेल्या ट्रकवर (क्र. एमएच ४२ बी ८८६६) टॅंकर आदळून हा भीषण अपघात झाला. अपघातानंतर पोलिस उपनिरीक्षक दिलीप पवार व सहकाऱ्यांनी घटनास्थळी धाव घेत ट्रकच्या मागील बाजूने शिरलेल्या दूधाचा टॅंकर स्थानिकांच्या मदतीने बाहेर काढला. यात टॅंकरच्या दर्शनी बाजूचा चक्काचूर झाला असून त्यात ज्ञानेश्वर वाजे हे आई व मुलासह अडकले होते. वाहने बाजूला केल्यानंतर युवांश जागीच मृतावस्थेत पडला होता. गंभीर जखमी अवस्थेतील ज्ञानेश्वर व शांताबाई यांना खासगी रुग्णालयात उपचारार्थ दाखल केले असता त्यांचाही मृत्यू झाला. प्रत्यक्षदर्शींच्या मते ट्रक रस्त्याकडेला थांबवून चालक लघुशंकेसाठी गेला होता त्यावेळी हा अपघात झाला. तर काहींच्या मते रस्त्याकडेला थांबलेला ट्रक चालकाने सुरू करून अचानक रस्त्यावर आणल्याने दूधाचा टॅंकर त्यावर आदळला. उपनिरीक्षक पवार यांनी घटनास्थळाचा पंचनामा केला असून गुन्हा दाखल करण्याचे काम रात्री उशिरापर्यंत सुरू होते.