पाबळ, ता.२१ : शिरूर तालुक्यात गेल्या काही दिवसांपासून पडलेल्या समाधानकारक पावसामुळे खरिपातील पिके जोमात आली आहेत. शेतकऱ्यांनी कीटकनाशकांची फवारणी, खुरपणी आदी कामे पूर्ण करून वरखते देण्याची लगबग सुरू केली आहे. मात्र, युरिया खताची कृत्रिम टंचाई निर्माण झाल्याने शेतकरी अक्षरशः हैराण झाले आहेत.

पिकांना योग्य वेळी खते दिल्यास अपेक्षित उत्पादन मिळते. त्यामुळे खत खरेदीसाठी शेतकऱ्यांची दुकानांत झुंबड उडाली आहे. परंतु काही विक्रेत्यांकडे पुरेसा साठा असूनही टंचाईचा बहाणा करून शेतकऱ्यांकडून जादा दर वसूल केला जात आहे. एवढेच नव्हे, तर एका गोणीसोबत पूरक खते घेण्याची सक्ती करून शेतकऱ्यांची आर्थिक पिळवणूक केली जात असल्याचा आरोप शेतकऱ्यांनी केला आहे.
दरम्यान, कृषी विभागाने तातडीने बफर स्टॉक उपलब्ध करून द्यावा आणि कृत्रिम युरिया टंचाईस जबाबदार विक्रेत्यांवर कठोर कारवाई करावी, अशी मागणी शेतकऱ्यांकडून होत आहे.

युरिया खत विक्रीत लिंकींगची सक्ती ही शेतकरी व विक्रेते दोघांसाठीही अडचणीची बाब आहे. आम्हाला जर भाडे व हमालीसह कोणत्याही अतिरिक्त खतांच्या लिंकिंगची जबरदस्ती न करता युरिया सरकारने जाहीर केलेल्या कमाल किंमतीत उपलब्ध करून दिला, तर आम्ही ‘‍ना नफा, ना तोटा’ या तत्त्वावर ही शेतकऱ्यांना युरिया देण्यास तयार आहोत.
- तेजस पडवळ, भैरवनाथ कृषी केंद्र, सविंदणे

सद्यस्थितीत शिरूर तालुक्यात १३०० टन युरिया शिल्लक आहे. जर विक्रेत्यांनी वितरण टाळले किंवा लिंकीगची सक्ती केली, तर अशा विक्रेत्यांवर कठोर कारवाई केली जाईल. कृषी विभागाच्या अधिकाऱ्यांच्या उपस्थितीत थेट शेतकऱ्यांना युरिया उपलब्ध करून दिला जाईल.
संजय काचोळे, जिल्हा अधीक्षक कृषी अधिकारी

दृष्टिक्षेपात
• युरिया उपलब्ध असूनही काही विक्रेत्यांकडून कृत्रिम टंचाई निर्माण केली जाते.
• कमाल किमती पेक्षा जादा दराने युरियाची विक्री होत असल्याचा शेतकऱ्यांचा आरोप
• युरिया खतासोबत लिकींगची सक्ती केली जाते.
• दुकानदारांना कमाल किमती व्यतिरिक्त भाडे व हमाली जादा द्यावी लागते.
• पॉस मशिनवर खतांचा साठा अपडेट न केल्याने अधिकृत साठा समजण्यास अडचण
• त्यामुळे शासनाच्या वेबसाईटवर टंचाई जाणवत नसल्याची प्राथमिक माहिती
01352