पाईट, ता. १४ ः विद्यार्थ्यांमध्ये सांस्कृतिक मूल्ये रूजावीत, विविध कलागुणांना वाव मिळावा या उद्देशाने जऊळके खुर्द जिल्हा परिषद शाळेत वार्षिक स्नेहसंमेलनाचे आयोजन करण्यात आले होते. यावेळी कार्यक्रमासाठी आलेल्या प्रेक्षक पालकांनी रोख स्वरूपात सुमारे ६३,००० रुपयांची देणगी शाळेला दिली.

कार्यक्रमात शेतकरी नृत्य, कोळी गीत, आदिवासी नृत्य, बतावणी, अफजलखान वध, शॅडो डान्स, लावणी असा कलाविष्कार सादर करण्यात आला. कार्यक्रमात प्रेक्षकांसाठी प्रश्नमंजूषा घेण्यात आली. या प्रसंगी माजी जिल्हा परिषद सदस्य बाबाजी काळे, जऊळके खुर्द गावच्या सरपंच संगीता बोऱ्हाडे, शालेय समिती अध्यक्ष प्रकाश राळे, उपाध्यक्ष सुजाता बोऱ्हाडे, टाकळकरवाडी केंद्राचे केंद्रप्रमुख दत्तात्रेय गोसावी, तंटामुक्ती अध्यक्ष लक्ष्मण बोऱ्हाडे, बाबूराव बोऱ्हाडे, माजी सरपंच योगेश बोऱ्हाडे, बाळासाहेब राळे, सुनील राळे आदी उपस्थित होते.

शाळेचे मुख्याध्यापक गणेश बैरागी, संतोष हांडे, सतीश यानभुरे व सिद्धार्थ ठोकळ यांनी कार्यक्रमाचे नियोजन केले.
------------------------------