पाईट, ता. २९ : खेड तालुक्याच्या पश्चिम पट्ट्यातील अनेक गावांमध्ये सध्या वीज दुरुस्तीची कामे वेगाने सुरू असून येत्या मे महिना अखेर कामे पूर्ण होणार असल्याचे पाईट येथील वीज वितरण केंद्राचे अधिकारी ए. एस. फोपाळे यांनी सकाळशी बोलताना सांगितले.
यामध्ये सध्या पाईट, शिवे, आडगाव येथे दुरुस्ती काम वेगात सुरू असून कुरकुंडी, किवळे, कोये, धामणे, रौधंळववाडी, अहिरे, तोरणेबुद्रुक, हेदृज, पाळू, पराळे, कासारी, टेकवडी, कान्हेवाडी, आंभू, आंबोली, औंढे, भलवडी, कोहिंडे खुर्द, सुपे, विराम, आख्तुली, अनावळे, गडद, खरवली या व इतर गावांमध्ये सध्या म्हणजे डीपी दुरुस्ती, वीज प्रवाहास अडथळा आणणारी झाडे, फांद्या कापणे, ट्रान्सफॉर्मर दुरुस्ती व देखभाल, सबस्टेशन मधील छोटी मोठी कामे, दोन तारांमधे अंतर टाकणे, लोंबकळणाऱ्या तारांची दुरुस्ती करून वीज प्रवाह ठीक करणे अशी कामे काही ठिकाणी सुरू आहेत, तर काही ठिकाणी सुरू करणार असल्याची माहितीही अधिकारी फोपाळे यांनी दिली.